Мотт кхиор Нохчийн мотт «Яндекс. Переводчик» сервис чу берзор бу Нохчийн мотт телефонан а, компьютеран а приложенешкахула Ӏамо а, бовза а дика хьелаш хир ду вайн кегийрхойн. Нохчийн мотт Ӏамо лаам бочаьрга хьоьжуш хаза кхаъ бу. Нохчийн Республикин дешаран а, Ӏилманан а министерствон Нохчийн меттан институтехь нохчийн-оьрсийн а, оьрсийн-нохчийн а онлайн-дошам вовшахтохаран болх дӀаболийна. Предложенеш а, текстийн кийсигаш а оьрсийн маттера нохчийн матте гочйеш боккха болх бу институтан говзанчаша дӀахьош. Леррина оцу балхана Нохчийн меттан институтехь вовшахтоьхна Пайдехьчу меттаӀилманан туш (Центр прикладной лингвистики). Цуьнан куьйгалхо йу къона меттан Ӏилманча Бадаева Ӏайшат. Институтан говзанчаша вовшахтоьхна гӀирс «Яндекс. Переводчик» веб-службин говзанчашка дӀакхочур бу. Билгалдаккха деза оьрсийн а, нохчийн а маттахь онлайн-дошам йархьама «Яндекс.Переводчик» сайтана мел лаххара 1 миллион сов предложенех лаьтта гӀирс оьшуш хилар. Оцу предложенех пайда а оьцуш, веб-службин нейронийн сеташна нохчийн мотт «Ӏамор» бу «Яндекс. Переводчикан» говзанчаша. Иштта хир бу кхузаманан лехамашна жоп луш йолу нохчийн-оьрсийн а, оьрсийн-нохчийн а онлайн-дошам кхолларан белхан шолгӀа мур. Нохчийн мотт «Яндекс. Переводчик» сайтан машане баккхаран мехала гӀуллакх кхочушдеш ду Нохчийн Республикин Куьйгалхочун Кадыров Рамзанан тӀедилларца. Дагадаийта лаьа 2021-чу шеран гӀуран (декабрь) беттан 16-чу дийнахь леррина оцу тӀедилларан хьокъехь Нохчийн Республикин дешаран а, Ӏилманан а министра Дааев Хож-Баудис Нохчийн Республикин Ӏилманийн академин президентаца Гапуров ШахӀрудица а, Нохчийн меттан институтан директорца Умхаев Хьамзатаца а цхьаьнакхетар дӀадаьхьна хилла хилар. _____________________ Кхид1а еша «Хьехархо» газетан керлачу лоьмарехь я heharho.ru сайта т1ехь. #Нохчийнмотт #дешар #газетаХьехархо